Denunciamos que nun se cubren les places de Llingua Asturiana y Gallego-Asturianu

 

CSI Educación denuncia que nun se tán cubriendo les places de Llingua Asturiana y Gallego-Asturianu

El sindicatu quier amosar el so disgustu y la so preocupación por mor de toles places que vienen quedando ensin cubrir

Profesores ensin plaza y places ensin profesor. Esa ye la situación que se vive n’Asturies nesti momentu. Tolos martes, la Conseyería d’Educación publica les places que ye necesario cubrir, tanto n’Educación Primaria como n’Educación Secundaria. Y tolos xueves, cuando dende esta Conseyería s’espublicen les axudicaciones, vese que dalgunes de les places nun cunten con un profesor o profesora que les ocupe.

Llingua Asturiana y Gallego-Asturianu nun son los únicos casos nos qu’asocede, ye una situación que se repite n’otres especialidaes como Llingua Castellana en Secundaria. Sicasí, estes materies sí son los casos más llaceriantes, yá que’l profesoráu de dambes asignatures cunta con menos derechos que’l restu de los trabayadores de la educación asturiana. Al nun esistir la especialidá docente, tampoco nun esiste la posibilidá de presentase a oposiciones. Entós, les condiciones d’esti profesoráu son peores que les del restu. Ye un grupu de trabayadores con menos derechos que los sos compañeros y compañeres.

Esta última selmana, tres places de Llingua Asturiana en Secundaria quedaron ensin cubrir. Y esta nun ye la esceición, sinón la norma dende qu’entamara’l cursu. Repítese lo mesmo en Primaria y en Secundaria, repítese lo mesmo en Llingua Asturiana y en Gallego-Asturianu. Toles selmanes un fenómenu idénticu dende setiembre.

¿Y quién son los otros grandes perxudicaos? Les y los estudiantes. Munchos d’ellos queden meses ensin una persona que-yos ponga clas. Nun se respeta’l so derechu a la educación. Y, al añu siguiente, una parte bien bultable decide abandonar l’asignatura, con tolo qu’ello supón a la escontra de la tresmisión del idioma. Si nun hai profesor/a, ¿pa qué se van matricular?

Dende CSI Educación esiximos a la Conseyería d’Educación que busque dalguna fórmula pa poner solución a esta situación. Namás cola aprobación de la especialidá vamos ver los derechos del profesoráu de les nuestres llingües propies n’igualdá col restu; pero, hasta que la aprueben (lo que yá tendría que tar fecho va cuantayá), necesitamos dalguna midida que permita acabar col problema.

lleer más…

Movilizaciones anunciaes

 🚨CSI INFORMA🚨

Énte les diverses movilizaciones anunciaes por diferentes sindicatos como consecuencia de los calendarios d'aplicación de la LOMLOE, queremos manifestar lo siguiente:

1° Saludamos toles iniciatives de movilización pa defender les condiciones llaborales del profesoráu.

2° De toles maneres, depués de más de dos años ensin movilizaciones (anque esistieren motivos pa ello), llama l'atención que, cuando falten 10 díes pa les eleiciones sindicales, dellos sindicatos entamen movilizaciones de forma independiente.

3° Bien pudiera paecer que los motivos son más eleutorales que d'otru tipu. Dende CSI creemos que nun se-y fai nengún favor al profesoráu si se-y unvia un mensaxe a la Conseyería de que los sindicatos namás se movilicen porque hai eleiciones y non porque hai motivos de fondu y ensin nengún tipu d'unidá nin consensu. 

*******************

🚨CSI INFORMA🚨

Ante las diversas movilizaciones anunciadas por diferentes sindicatos como consecuencia de los calendarios de aplicación de la LOMLOE, queremos manifestar lo siguiente:

1° Saludamos todas las iniciativas de movilización para defender las condiciones laborales del profesorado.

2° No obstante, tras más de dos años sin movilizaciones (a pesar de existir motivos para ello), resulta curioso que a falta de 10 para las elecciones sindicales varios sindicatos inicien movilizaciones por separado.

3° Tal pudiera parecer que los motivos son más electorales que de otro tipo. Desde CSI creemos que se le hace un flaco favor al profesorado si se le envía un mensaje a la Consejería de que los sindicatos tienden a movilizarse porque hay elecciones y no porque hay motivos de fondo sin ningún tipo de unidad ni consenso

lleer más…

Comunicáu de CSI Educación énte les últimes declaraciones de la conseyera

 

Comunicáu de CSI Educación énte les últimes declaraciones de la conseyera

La conseyera d’Educación d’Asturies, Lydia Espina, vien d’afirmar na Xunta Xeneral que’l Gobiernu nun va volver a trabayar nel Plan Pilotu Esperimental de Promoción del Usu del Asturianu. Dende la seición sindical d’Educación de la Corriente Sindical d’Izquierda queremos amosar la nuestra sorpresa y el nuestru refugu énte estes declaraciones.

En primer llugar, abúltanos sorprendente que la Conseyería nun quiera da-y vida a un plan que tuvo, según responsables de la propia Alministración, bonos resultaos en tolos centros onde se desendolcó. Ye ablucante que’l que defende ser el gobiernu más asturianista de la historia nun defenda la presencia de les llingües propies d’Asturies nes aules d’Asturies.

Amás, refugamos estes declaraciones porque esti plan sirvió pa ver cómo, en dellos centros educativos d’Asturies, l’asturianu podía emplegase como llingua vehicular en distintes asignatures. L’usu del asturianu nun suponía nengún perxuiciu pa los escolinos, sinón tolo contrario: pudieron decatase d’esta manera de que la llingua que munchos d’ellos falaben fuera de les aules tamién sirvía pa esplicar cualesquier materia, pa falar de cualesquier tema, con tola importancia qu’esto podía tener pa la so autoestima llingüística.

Tolos espertos tán d’alcuerdu en que’l sistema educativu ye una de les ferramientes básiques pa protexer y normalizar una llingua en peligru de desapaecer. Poro, la Conseyería tendría que caminar nesta direición y nun dar pasos atrás. Camentamos qu’Asturies necesita que l’asturianu y el gallego-asturianu, les nuestres llingües propies, puedan emplegase como llingües vehiculares nel sistema educativu. Poro, esiximos a los responsables políticos que diseñen un plan específicu nesti sen. Un plan que nun seya yá pilotu, sinón una realidá en tolos centros educativos.

Per otra parte, nun ye esti l’únicu pilancu que pon el Gobiernu d’Asturies al asturianu y el gallego-asturianu esta llexislatura. Amás de siguir permitiendo que’l profesoráu d’estes materies nun tenga opción a presentase a oposiciones por mor de la falta d’especialidá docente, la Conseyería d’Educación tamién-y robó una hora a l’asignatura na etapa de la Educación Secundaria Obligatoria (pasando nel últimu cursu de la ESO de tres a dos hores selmanales). Anque depués quieran xustificase cola ampliación d’hores en Bachilleratu, la realidá ye que la presencia del asturianu y del gallego-asturianu ye bien ruina en tol sistema educativu, dende Educación Infantil (onde malpenes apaez) hasta les enseñances secundaries nes que dalgunos docentes d’otres asignatures siguen negando la condición de llingua pal asturianu y el gallego-asturianu, pasando per una Educación Primaria na que tampoco nun se meyoró la situación de los idiomes propios.

Pa rematar, dende CSI Educación esiximos un cambiu na forma d’actuar de la Conseyería d’Educación y del Gobiernu al completu, tratando a les llingües propies d’Asturies cola dignidá que merecen. Pa ello, amás d’una declaración d’OFICIALIDÁ que nun vamos dexar de defender, esiximos que se cumplan les siguientes midíes:

• Inclusión de les materies de Llingua Asturiana y Gallego-Asturiano na Formación Profesional Básica.
• Creación, a la fin, de la especialidá docente. Nun somos a entender cómo dos gobiernos del mesmu collor políticu nun son a ponese d’alcuerdu pa garantizar los derechos llaborales de tantes persones.
• Igualdá de tratu al profesoráu de Llingua Asturiana y Gallego-Asturiano, incluyendo la posibilidá de presentase a oposiciones.
• Aumentu de les hores llectives que se dediquen a les materies de Llingua Asturiana y Gallego-Asturiano en toles etapes educatives (Infantil, Primaria, Secundaria, Bachilleratu y Formación Profesional).
• Creación del Departamentu de Llingua Asturiana/Gallego-Asturiano nos centros educativos.

lleer más…