Denunciamos que nun se cubren les places de Llingua Asturiana y Gallego-Asturianu

 

CSI Educación denuncia que nun se tán cubriendo les places de Llingua Asturiana y Gallego-Asturianu

El sindicatu quier amosar el so disgustu y la so preocupación por mor de toles places que vienen quedando ensin cubrir

Profesores ensin plaza y places ensin profesor. Esa ye la situación que se vive n’Asturies nesti momentu. Tolos martes, la Conseyería d’Educación publica les places que ye necesario cubrir, tanto n’Educación Primaria como n’Educación Secundaria. Y tolos xueves, cuando dende esta Conseyería s’espublicen les axudicaciones, vese que dalgunes de les places nun cunten con un profesor o profesora que les ocupe.

Llingua Asturiana y Gallego-Asturianu nun son los únicos casos nos qu’asocede, ye una situación que se repite n’otres especialidaes como Llingua Castellana en Secundaria. Sicasí, estes materies sí son los casos más llaceriantes, yá que’l profesoráu de dambes asignatures cunta con menos derechos que’l restu de los trabayadores de la educación asturiana. Al nun esistir la especialidá docente, tampoco nun esiste la posibilidá de presentase a oposiciones. Entós, les condiciones d’esti profesoráu son peores que les del restu. Ye un grupu de trabayadores con menos derechos que los sos compañeros y compañeres.

Esta última selmana, tres places de Llingua Asturiana en Secundaria quedaron ensin cubrir. Y esta nun ye la esceición, sinón la norma dende qu’entamara’l cursu. Repítese lo mesmo en Primaria y en Secundaria, repítese lo mesmo en Llingua Asturiana y en Gallego-Asturianu. Toles selmanes un fenómenu idénticu dende setiembre.

¿Y quién son los otros grandes perxudicaos? Les y los estudiantes. Munchos d’ellos queden meses ensin una persona que-yos ponga clas. Nun se respeta’l so derechu a la educación. Y, al añu siguiente, una parte bien bultable decide abandonar l’asignatura, con tolo qu’ello supón a la escontra de la tresmisión del idioma. Si nun hai profesor/a, ¿pa qué se van matricular?

Dende CSI Educación esiximos a la Conseyería d’Educación que busque dalguna fórmula pa poner solución a esta situación. Namás cola aprobación de la especialidá vamos ver los derechos del profesoráu de les nuestres llingües propies n’igualdá col restu; pero, hasta que la aprueben (lo que yá tendría que tar fecho va cuantayá), necesitamos dalguna midida que permita acabar col problema.

lleer más…

Defensa de les llingües propies d'Asturies

La seición sindical d’Educación de la Corriente Sindical d’Izquierda lleva apostando, dende la so fundación, pola defensa de les llingües propies d’Asturies. Entendemos qu’una enseñanza pública que tenga en cuenta la realidá asturiana nun pue dexar de llau al asturianu y el gallego-asturianu. El nuestru compromisu cola presencia digna de los nuestros idiomes nes aules asturianes nun se pue negar, como amuesa la nuestra voluntá de que toles publicaciones seyan bilingües o namás n’asturianu. Tamién queremos avanzar na normalización del gallego-asturianu dientro del nuestru sindicatu, un deber que nun escaecemos.

L’asturianu y el gallego-asturianu cuerren peligru de desapaecer. Nun hai duldes, asina lo señalen espertos de diferentes organizaciones y llugares del mundu. Si queremos da-y la vuelta a esta realidá, la situación de les nuestres llingües nes aules tien de cambiar. Dambos idiomes han tar presentes en toles etapes educatives, dende la Educación Infantil hasta’l Bachilleratu, incluyendo tamién la Formación Profesional. Una de les nuestres propuestes pa estes eleiciones sindicales ye, amás del aumentu del númberu d’hores en toles etapes onde yá esisten, la so presencia na Formación Profesional Básica.

Amás, tenemos que tener en cuenta que l’asturianu y el gallego-asturianu nun puen falase namás nes hores de les propies asignatures. CSI Educación defende la elaboración d’un Plan seriu qu’abra’l camín hacia la normalización de los nuestros idiomes nel sistema educativu, como llingües vehiculares n’estremaes materies. Esti Plan nun pue ser yá Pilotu, sinón un compromisu real y con resultaos de la Conseyería d’Educación y de tol Gobiernu d’Asturies.

Per otra parte, nun queremos dexar de llau a los y les profesores de Llingua Asturiana y Gallego-Asturiano, tovía más maltrataos que’l restu de los docentes d’Asturies. Defendemos l’aprobación, a la fin y con munchos años de retrasu, de la especialidá docente, lo que permitiría la convocatoria d’oposiciones y la igualdá de condiciones col restu de profesores. Nun nos paez serio qu’un grupu de trabayadores cunte con menos derechos que la mayoría namás por impartir una asignatura con menos prestixu y apoyu políticu qu’otres. Xunto a esto, la creación del Departamentu de Llingua Asturiana o Gallego-Asturiano ye otra de les midíes que proponemos. Too ello ensin dexar de reivindicar la oficialidá como única salida digna y de futuru pa los nuestros idiomes.

Pa rematar, si pienses que l’asturianu y el gallego-asturianu tienen de formar parte del nuestru enseñu, si crees que los y les profesores d’estes materies nun son menos que los demás, si te paez que la explotación de llingües y docentes tien qu’acabar, CSI Educación pue ser una ferramienta pa solucionar estos problemes.

#VotaCSI

Puedes consultar aquí tol nuestru programa y les persones candidates:

 👇

Programa

Persones candidates

 

lleer más…

Comunicáu de CSI Educación énte les últimes declaraciones de la conseyera

 

Comunicáu de CSI Educación énte les últimes declaraciones de la conseyera

La conseyera d’Educación d’Asturies, Lydia Espina, vien d’afirmar na Xunta Xeneral que’l Gobiernu nun va volver a trabayar nel Plan Pilotu Esperimental de Promoción del Usu del Asturianu. Dende la seición sindical d’Educación de la Corriente Sindical d’Izquierda queremos amosar la nuestra sorpresa y el nuestru refugu énte estes declaraciones.

En primer llugar, abúltanos sorprendente que la Conseyería nun quiera da-y vida a un plan que tuvo, según responsables de la propia Alministración, bonos resultaos en tolos centros onde se desendolcó. Ye ablucante que’l que defende ser el gobiernu más asturianista de la historia nun defenda la presencia de les llingües propies d’Asturies nes aules d’Asturies.

Amás, refugamos estes declaraciones porque esti plan sirvió pa ver cómo, en dellos centros educativos d’Asturies, l’asturianu podía emplegase como llingua vehicular en distintes asignatures. L’usu del asturianu nun suponía nengún perxuiciu pa los escolinos, sinón tolo contrario: pudieron decatase d’esta manera de que la llingua que munchos d’ellos falaben fuera de les aules tamién sirvía pa esplicar cualesquier materia, pa falar de cualesquier tema, con tola importancia qu’esto podía tener pa la so autoestima llingüística.

Tolos espertos tán d’alcuerdu en que’l sistema educativu ye una de les ferramientes básiques pa protexer y normalizar una llingua en peligru de desapaecer. Poro, la Conseyería tendría que caminar nesta direición y nun dar pasos atrás. Camentamos qu’Asturies necesita que l’asturianu y el gallego-asturianu, les nuestres llingües propies, puedan emplegase como llingües vehiculares nel sistema educativu. Poro, esiximos a los responsables políticos que diseñen un plan específicu nesti sen. Un plan que nun seya yá pilotu, sinón una realidá en tolos centros educativos.

Per otra parte, nun ye esti l’únicu pilancu que pon el Gobiernu d’Asturies al asturianu y el gallego-asturianu esta llexislatura. Amás de siguir permitiendo que’l profesoráu d’estes materies nun tenga opción a presentase a oposiciones por mor de la falta d’especialidá docente, la Conseyería d’Educación tamién-y robó una hora a l’asignatura na etapa de la Educación Secundaria Obligatoria (pasando nel últimu cursu de la ESO de tres a dos hores selmanales). Anque depués quieran xustificase cola ampliación d’hores en Bachilleratu, la realidá ye que la presencia del asturianu y del gallego-asturianu ye bien ruina en tol sistema educativu, dende Educación Infantil (onde malpenes apaez) hasta les enseñances secundaries nes que dalgunos docentes d’otres asignatures siguen negando la condición de llingua pal asturianu y el gallego-asturianu, pasando per una Educación Primaria na que tampoco nun se meyoró la situación de los idiomes propios.

Pa rematar, dende CSI Educación esiximos un cambiu na forma d’actuar de la Conseyería d’Educación y del Gobiernu al completu, tratando a les llingües propies d’Asturies cola dignidá que merecen. Pa ello, amás d’una declaración d’OFICIALIDÁ que nun vamos dexar de defender, esiximos que se cumplan les siguientes midíes:

• Inclusión de les materies de Llingua Asturiana y Gallego-Asturiano na Formación Profesional Básica.
• Creación, a la fin, de la especialidá docente. Nun somos a entender cómo dos gobiernos del mesmu collor políticu nun son a ponese d’alcuerdu pa garantizar los derechos llaborales de tantes persones.
• Igualdá de tratu al profesoráu de Llingua Asturiana y Gallego-Asturiano, incluyendo la posibilidá de presentase a oposiciones.
• Aumentu de les hores llectives que se dediquen a les materies de Llingua Asturiana y Gallego-Asturiano en toles etapes educatives (Infantil, Primaria, Secundaria, Bachilleratu y Formación Profesional).
• Creación del Departamentu de Llingua Asturiana/Gallego-Asturiano nos centros educativos.

lleer más…