LLECTURA PÚBLICA escontra la LLEI WERT y en favor de la ESCUELA PÚBLICA
Profesoráu y escolinos/escolines del Conceyu Siero
Xueves 28 de frebreru de 2013A les 16:45 hores
Casa Conceyu de La Pola, SIERO
miércoles, 27 de febrero de 2013
miércoles, 13 de febrero de 2013
domingo, 10 de febrero de 2013
MANIFESTACIÓN ESCONTRA LA REPRESIÓN 14 de febreru a les 19:30 h. Plaza L'Humedal (Xixón)
Comunicáu de la CSI:
Na pasada fuelga xeneral del 14-P, un piquete informativu de CSI y CXT foi afrelláu brutalmente por delles cargues de la policía nacional (UIP), que llegaron a invadir la Casa Sindical de Xixón, cola resultancia de 4 presones deteníes y ocho presones imputaes por delles causes.
N’Asturies y nel Estáu español hai centenares de presones deteníes, encausaes, multaes, feríes o mancaes, actuaciones policiales brutales, allanadures de sedes sindicales, ataques a drechos de xunta y manifestación, coacciones a drechos de fuelga, etc.
La represión yá ye xeneralizada y puede cayer sobre cualisquier presona que faiga cualquier triba protesta. Les llibertaes sindicales y ciudadanes entamen a ser parte’l pasáu, demientres les Delegaciones de Gobiernu y la policía actúen con impunidá dafechu.
Pero too esto nun ye porque sí. Demientres estos años tamos sufriendo incesantes agresiones d’un sistema capitalista, que non solo echen per tierra tolos derechos de les y los trabayadores, sinón que desanicien los drechos más básicos de cualesquier ser humanu. Un trabayu dignu, una vivienda, un hospital, una escuela o l’atención de los servicios sociales, empiecen a ser un privilexu pa unos pocos.
Tolos seres humanos tendríen de tener garantizaos los sos derechos básicos pol simple fechu d’esistir. Pero nun ye asina. Los únicos que nacen con drechos son los ricos. Los y les trabayadores tenemos de conquistar esos drechos y, dempués, lluchar pa caltenelos, porque si non, perdémoslos.
Y nesa llucha atopamos la represión, los golpes, les multes millonaries, les detenciones y la cárcel.
Nun somos sindicatos de pactu y collaboración, sinón de resistencia y enfrentamientu a un sistema capitalista que pretende aumentar el so poder amenorgando a escombros el mundu nel que vivimos.
Denunciamos la represión, pero pescanciámosla comu una consecuencia, desagradable pero inevitable, de la nuesa llucha. Podemos perder batalles, pero la palabra rindición nun ta nel nuesu diccionariu. La hestoria de la clase obrera asturiana escribióse, escríbese y va siguir escribiéndose con otres palabres: firmeza, determinación, solidaridá y llucha.
Sentaes y sentaos nel sofá de la nuesa casa nun vamos camudar les coses.
¡O MOVÉMONOS O CÓMENNOS!.
martes, 5 de febrero de 2013
CSI sofita dafecho: NON A LA DOBLE REDE, NON A LOS CONCIERTOS, POLA ESCUELA PÚBLICA.
Entamen: Marea Asturverde y MSEPA
viernes, 1 de febrero de 2013
Los profesores d’asturianu entreguen al Gobiernu más de 2.000 razones pa caltener y impulsar la materia
Febreru 1, 2013 por Pablo R. Guardado
La maestros d’asturianu presentaron nel Rexistru un escritu pa la conseyera nel que se demanda una solución pa la materia énte la LOMCE. Acompañóse de 2.100 cartes d’escolinos nes qu’éstos amosaben el so ciñu hacia la llingua asturiana.
Tres l’asamblea celebrada’l 15 de xineru, los profesores de Llingua Asturiana y Gallego-asturiano decidieron, ente otres munches aiciones, trabayar colos alumnos pa que, en clase, redautaren cartes nes qu’espresaren el so sentir hacia la llingua. Asina, axuntáronse alredor de 2.100 redaiciones de neños y neñes de 44 centros escolares, qu’ayeri s’entregáron nel Rexistru Xeneral del Gobiernu xunto con diez resoluciones de claustros favoratibles a les demandes de los maestros, una cantidá que va aumentar nes selmanes próximes cuando más escueles celebren aconceyamientos. La convocatoria anuncióse a les 17.30 hores, pero foi a les 18 hores cuando, ún por ún, tolos docentes entregaron les cartes y una copia del escritu nel mostrador. Xunto a los maestros tamién acudieron militantes de Xunta Moza y de la Xunta pola Defensa de la Llingua Asturiana p’amosar el so sofitu.
Estes cartes queden agora a disposición del Executivu, que va poder comprobar el ciñu que tienen los escolinos y escolines hacia l’idioma. Dalgún profesor de Primaria inclusive destacaba la so sorpresa tres lleer los testos de los sos alumnos, sobre manera los más mayores, pola estima qu’amosaben hacia la llingua. Como nota negativa, dalgunos centros impidieron que s’entregaran les cartes alegando la privacidá nos datos de los alumnos.
L’escritu qu’acompañaba los testos fechos polos escolinos y escolines demanda a la conseyera d’Educación, Cultura y Deporte, Ana González, y al Gobiernu que “utilicen tolos medios necesarios pa camudar l’actual situación”, en referencia al llugar nel que queda la llingua asturiana cola entrada de la Llei Orgánica pa la Meyora de la Calidá Educativa (LOMCE), col oxetivu d’acabar “cuanto primero col status de segundu orde de la Llingua Asturiana, criando la especialidá nel Sistema Educativa y declarando la oficialidá”. Amás, el testu recuerda los 230 puestos de trabayu que peligren cola desapaición de la materia cola entrada de la Llei Wert tal como ta redautada anguaño, y critica la incertidume que provoca la conseyera col so silenciu sobre esti asuntu. Hai que destacar que González tampoco nun respondió’l pidimientu de los maestros de celebrar una reunión pa tratar la situación.
2.500 firmes en change.org y movilizaciones nueves
Depués de la entrega del escritu y les cartes, los maestros aconceyaron nel IES Aramo pa concretar les aiciones próximes. L’asamblea valoró de manera positiva la respuesta del profesoráu y trató dellos asuntos, como’l tema de les mociones treslladaes a los claustros o la enmienda presentada nel Conseyu Escolar del Estáu dende la conseyería asturiana. Los profesores consideraron ésta última como “una auténtica chapuza, tanto na forma como nel conteníu, yá que nun garantiza pa nada la continuidá de l’asignatura”.
Les decisiones tomaes nel conceyu d’ayeri foron participar en toles movilizaciones sociales que se presenten en feches próximes sobre los recortes y la política d’austeridá de les alministraciones con un cortexu propiu pa dar visibilidá a la problemática, asina como na manifestación contra la LOMCE del xueves (Uviéu, 16 hores) y la de tolos sectores en llucha del día 23 cola pancarta ‘Llingua nes escueles, como les demás’. Tamién ta prevista una concentración la tarde del 21 de febrero na plaza Escandalera d’Uviéu coincidiendo col Día Internacional de la Llingua Materna. Por último, l’asamblea afondó na necesidá d’implicar tamién a los padres, estudiantes y al conxuntu del profesoráu, y apautó demandar tamién la presencia del asturianu n’Infantil y la so incoporación como materia d’esame na PAU.
Otra manera, la campaña ‘Nun permitas que l'asturianu desapaeza del sistema educativu’, entamada al traviés de les redes sociales, en change.org, páxina d’orixe estuaxunidense que recueye pidimientos d’usuarios pa denunciar y tratar de camudar asuntos concretos, yá tien recoyíes más de 2.500 firmes. Por caúna d’elles, la Conseyería d’Educación, Cultura y Deporte recibió un corréu electrónicu coles demandes de los profesores de Llingua Asturiana y Gallego-asturiano.
Profesores y militantes de Xunta Moza aconceyen frente al Rexistru minutos enantes d’entregar l’escritu y les cartes.