CSI-CAXASTUR/LIBERBANK
La Delegación de Gobiernu n’Asturies pretende, per tercer añu consecutivu, faer invisible la concentración convocada pola Corriente Sindical d’Izquierda (CSI) na plaza La Escandalera, coincidiendo cola entrega de los Premios Princesa d’Asturies.
Nun resolvimientu fecháu’l 5 ochobre, referida a la comunicación per parte la Corriente Sindical d’Izquierda (CSI) de Caxastur pa una convocatoria de concentración de trabayadores énte la see la entidá, pa protestar pola privatización de Caxastur y los EREs, retayos y despidos aplicaos en Caxastur/Liberbank, coincidiendo cola ceremonia d’entrega de los Premios Princesa d’Asturies el viniente día 23 d’ochobre, la Delegación de Gobiernu n’Asturies altrica que dos tercios de la plaza La Escandalera (los más averaos al Teatru Campoamor) van tar ocupaos neses feches por una esposición promovida pola Fundación Princesa d’Asturies.
Con esta disculpia, la Delegación de Gobiernu alcuerda “Condicionar la concentración comunicada pal día 23 d’Ochobre de 2015, ente les 17 y les 20 hores, na plaza La Escandalera d’Uviéu afitando’l llugar de concentración en dicha plaza nel so terciu más averáu a la cai San Francisco, dexando llibre la salida’l parking qu’ellí s’atopa.
Alviértese espresamente al convocante de la illicitú de la concentración que pudiera llevase a cabu n’otru llugar estremáu al espuestu”
Obviamente, lo que pretende con esta burda maniobra’l Delegáu del Gobiernu ye faer invisible la protesta énte los convidaos a la ceremonia de los premios y énte la prensa encargada de cubrir l’eventu.
En 2013 y en 2014, énte la intención de la Delegación del Gobiernu n’Asturies de desplazar la protesta a llugares qu’enzancaren o torgaren la so trescendencia pública, los y les trabayadores de Caxastur/Liberbank tuvimos qu’allegar énte’l Tribunal Supeior de Xusticia d’Asturies pa defender los derechos de xunta y manifestación. En dambos casos, el TSXA dionos la razón, autorizando la concentración en La Escandalera, que llevóse a cabu ensin dengún tipu d’incidente.
El Delegáu del Gobiernu n’Asturies pretende, una vegada más, que namás sía visible l’Asturies de charanga y pandereta y pretende qu’una ceremonia que pagamos tolos ciudadanos y ciudadanes, sía un espectáculu cortesanu pa unos pocos privilexaos, una Asturies tornada per unos díes nuna Aldea Potemkin de cartón piedra, onde nun se pueda sintir la voz de l’Asturies real con 100.000 paraos y paraes, zarros d’empreses, EREs xeneralizaos pa despidir a baxu costu y retayar salarios, privatizaciones y retayos n’enseñanza, sanidá y alministración pública, l’atracu de la privatización/lliquidación de Caxastur, los retayos brutales a los y les sos trabayadores y la estafa a los aforradores de les preferentes y la delda subordinada, la lliquidación de la minería, la conxelación de les pensiones y los salarios de los funcionarios y funcionaries, la corrupción política y tantes otres situaciones inxustes que tán llevándonos al abismu social.
Igualmente, el Delegáu del Gobiernu n’Asturies intenta retayar entá más el derechu a la protesta social y pretende que los afectaos pola cris nun podamos nin siquier manifestanos en llugares onde nos tengan qu’oyer los responsables de dicha cris.
Considerando que los altriques de la Delegación de Gobiernu nun desvirtúen n’absolutu’l derechu de xunta y de manifestación, la CSI va presentar, un añu más, recursu contenciosu-alministrativu énte’l Tribunal Superior de Xusticia d’Asturies.
Más info: CSI Asturies